Acts 25

1A nyipyei ngu ata shi Festos ɓei ɓe Kaisariya wa lo Urushelima. Wo ɓei ɓe Kaisariya ntu ge wa la Feliks tnu-tnu nu wato Gwamna eknihi nya nu. 2A Urushelima yi atukwoda ɓa gye wo nɓo, ɓa gna wo Bulus ɓeda vinya. 3ʼBa gyiwo wye ntuge wa ɓe n Bulus yi n Urushelima, ɓa ɓei ye ɓa wu wo nu. 4Amma Festos wa ci ɓa ge, “Bulus lu Kaisariya du woi ɓei gni woi lo ɓo nu nwohin 5Ntu cenu aza n ɓa kpe ɓeye ye lo ɓa ɓe Kaisariya n ɓahin nabai a dawa nbwai.”

A Ya Bulus Wada

6Shi anyipyei ngu awo ɓei ku si, wa jeze lo Kaisariya. Efya gyi wa ya Bulus wa da.

7Shi Bulus ɓei lo dna n kotu a Yahudiyi nɓa ɓei kun n Urushelima nyi, ɓa ku yezhi, ɓai da owo alaifi ɓo n tna asaida. 8Bulus wa na aɓo, wa gna, “Mi to n laifi yi lo m, ntu ge mi to zun Ayahudiyi awyidna gna m, ko ma da ɓenukwoyi tu aduwanyakun tukwo m, ko ma zhin gaba n Roma yi gwanmati yi m.”

9Festus woi ye owo ɓo kwa da Ayahudiyi wa nya wo ge, “Ho ɓa ye halo Urushelima, mi da ho owa n bwai?”

10– 11Ama Bulus wa ye wa gna, “awo, miɓa ye Esu Roma nya wa wo mi. Ho kpe lo ge mi to n laifi yi lo m. Ndei mi ku laifi zhin nkwo kunce lo n fi yi, mi ta naɓo lo ge ma fi m, ama ndei mi zhin oza kni-kniyi nu, ozaho to iko yi lo wa dna mi n aza deye akun ntu ge ɓa wu min. Nɓa ye ma lo Kaisar aba.”

12Festus wa zhin shaula nwo shaula gayi, wa gna, abmiya lo la ye ge ha lo Kaisar aba, Kaisar aba nu n ho ɓa lo!

13Anyipyei ho fyewyi ɓa duya, Esu Agarippa n Banis yi ɓa ɓe Festus gnaɓi. 14Dna anyipyei n ɓa ɓei fi ɓo nyi, Festus wa zhin shaula tu n Bulus tukwo n ʼsu yi wa gna wo ge, “Za-wan-wan ho dna lo n ya n Feliks ɓei ya wo ɓeda shi ge ma da. 15Esa nu mi ɓei dna n Urushelima a malami adnagmayi ɓedo Ayadudiyi abyeda yi, ɓa ku ɓa lafiya wu mi har ɓa gna mi ge mi la wo wu. 16Ma ku wu ɓa ge a Romayi owa ta zun oza kni to ai da wo owan, a zhin a esa ga wo ɓa da ɓo n za yi nɓo nɓai dna a je yi.

17“Shi ɓa ɓo ɓe ya, efye kwa gyi, a ɓeda kun zhi, ma ɓe n Bulus yi. 18Ama ma wo aɓeda n ɓa ɓo da tu nwo tukwo nyi, to ma gye aɓo nu n mi ɓei cei mwi m. 19Oɓo nyi tu nɓa kunnu tukwo nu, oza ho ge a yi wo ge Yesu, wa fi, amma Bulus wa gyi tu ge wo n wye-wyei lo. 20Ma ku jeje ngye shi mi ɓa zun ɓeda ye ya, ma nya wo kwo wo ɓa ye a da wo owa tu aɓeye tukwo n Urushelima. 21Ama Bulus wa gna ge, wo ɓa ye wa lo n ɓeda yi n Kaisar aba. Shi wo ɓo da lonu, ma gna ge a lo n woi, o la wo je gu, har ma zhin shiri ma tnu n woi n Esu dnagmayi aba.”

22Agaribas wa gna ge, nɓa ye ma wo wo ɓeda n mihin. Festus wa gna wo ge, Ho ɓei wo wo nsu.

23Shi efye ɓo gyi, esu ɓedo n Barniki yi ɓa ɓe kwotu nɓa mwa-mwa ɓedo asoja atukwo da yi, n aza adnagmayi ezhi hi Festus wa gna ge a ɓe n Bulus yi.

24Festus wa da ɓo na za yi wa gna, “Esu Agaribas ɓedo aza yi vinya, Ayahudiyi n ɓa ʼya ɓedo aza yi n ɓa lo n Urushelima, ɓa ce pma ge awu oza deye. 25Amma n mi wyegye, wo to zhin nyaho nkwo kunce awu wom. Dudu lonu wo ku na ge wo ɓa lo nɓeda yi n Kaisar aba, omihin mi to nɓodo yi lo nmi ɓa zhin m, sai ma tnu woi. 26Ama mɓa ka kniɓeyi ma ga Esu dnagmayi hi a? Ntu ge mi to gye wo laifi, na gna ge wa zhin m, cenu a zhin mi ɓe nwo yi n fye abye vinya, Oho Esu Agaribas ha mwi wo, ha wu mi nya mi ɓa ka. 27Ntu ge kwo ta wu mi lo dei-dei ma tnu n za wan-wan yi n Esu dnagmayi aba ntna ɓo tukwo m.”